माहिती व जनसंपर्क महासंचालनालयाचे महासंचालक विजय नाहटा यांची बदली करण्यात आली असून त्यांची नियुक्ती मराठी भाषा विभागाच्या सचिव पदी करण्यात आली आहे. त्यांच्याकडे सध्याच्या महासंचालक, माहिती व जनसंपर्क महासंचालनालय या पदाचा तसेच या विभागाच्या सचिव पदाचा अतिरिक्त कार्यभारही सोपविण्यात आला आहे.
विजय नाहटा यांना प्रशासकीय सेवेतील उल्लेखनीय कार्यासाठी पंतप्रधान डॉ.मनमोहन सिंग यांच्या हस्ते दिनांक २१ एप्रिल, २०११ रोजी सिव्हिल सर्व्हिस दिनानिमित्त नवी दिल्ली येथील विज्ञान भवनात पुरस्कार देऊन गौरविण्यात आले आहे.
श्री. नाहटा हे १९९५ च्या भारतीय प्रशासकीय सेवतील अधिकारी असून त्यांनी नवी मुंबई महापालिकेचे आयुक्त म्हणून उल्लेखनीय कार्य केले आहे. मुख्यमंत्र्यांचे उपसचिव व कोकण विभागाचे अतिरिक्त आयुक्त म्हणूनही त्यांनी काम केले आहे. तत्पूर्वी त्यांनी चंद्रपूर, नांदेड, सातारा, पुणे, मुंबई इत्यादी ठिकाणी विविध पदांवर काम करुन आपल्या कार्याचा ठसा उमटविला आहे.
No comments:
Post a Comment