ऋण प्रसंस्करण केन्द्राचा अभिनव उपक्रम
वर्धा, दि.22– परंपरागत शेती ऐवजी उच्च तंत्रज्ञानावर आधारीत शेतीला चालना देण्यासाठी वर्धा जिल्ह्यातील युवा शेतक-यांना पॉली हाऊसच्या माध्यमातून आधुनिक शेती करण्यासाठी जिल्ह्याची अग्रणी बँक असलेल्या बँक ऑफ इंडियाच्या ऋण प्रसंस्करण केन्द्राने अभिनव उपक्रमाची सुरुवात केली आहे.
शेतक-यांना खरीप व रब्बी पिकांसाठी कर्ज पुरवठा करत असतानाच शेतक-यांनी उच्च तंत्रज्ञानावर आधारीत शेती करावी तसेच युवा शेतक-यांनी प्रगत शेतीचा अंगीकार करावा यासाठी शेडनेट व पॉलीहाऊस च्या माध्यमातून भाजीपाला व फूलशेती करण्यासाठी जिल्ह्यातील 40 शेतक-यांना कृषि ऋण प्रसंस्करण केन्द्रातर्फे अर्थसहाय्य करण्यात आली असल्याची माहिती या केन्द्राचे वरिष्ठ व्यवस्थापक एस.वाय. शिर्सीकर यांनी आज दिली.
जिल्ह्यातील शेतक-यांना या केन्द्रामार्फत मार्गदर्शन करण्यासोबत त्यांना शेती व शेती संलग्न पुरक उद्योगांना कर्जपुरवठा करण्यात येत असून, प्रगत शेतीच्या तंत्रज्ञानासाठी सुलभपणे व अल्पावधीत कर्ज प्रकरणे मंजूर करण्यात येत असून या योजनेचा जिल्ह्यातील शेतक-यांना चांगला उपयोग होत आहे. या केन्द्रातर्फे किसान क्रेडीट कार्ड, जमिन सुधारणा, हरितगृह (शेड नेट, पॉली हाऊस, कृषि विषयक यंत्रसामुग्री, दुध उत्पादक , पोल्ट्री फार्म, बकरी पालन, फूलशेती, फळबाग, तसेच सौर कुंपनासाठी या बँकेतर्फे शेतक-यांना सुलभपणे कर्जपुरवठा करण्यात येते.
जिल्ह्याची अग्रणी बँक असलेल्या बँक ऑफ इंडिया तर्फे मागील वर्षी 1 हजार 447 शेतक-यांना 34 कोटी 18 लाख रुपयाचा कर्ज पुरवठा करण्यात आला असून, यावर्षी 497 शेतकरी खातेदारांना 15 कोटी 75 लाख रुपये कर्ज पुरवठा करण्यात आला आहे.
युवा शेतक-यांचे शेडनेट
जिल्ह्यातील युवा शेतक-यांना शेतीविषयक तांत्रिक माहिती देऊन तसेच अत्याधुनिक माहिती च्या आधारावर शेडनेट व पॉलीहाऊस सुरु करण्यासाठी प्रोत्साहन दिले आहे त्यामुळे जिल्ह्यात शेडनेट व पॉली हाऊस व्दारे मोठ्या प्रमाणात उत्पादनालाही सुरुवात झाली आहे. हिंगणघाट तालुक्यातील मारोतराव झोटींग यांना दोन पॉलीहाऊस साठी 24 लाख रुपयाचे कर्ज उपलब्ध करुन दिले असून, त्यांनी भाजीपाला व फुलशेतीचा अभिनव उपक्रम राबविला आहे.
धानोरा येथे अशोक शंकरराव बुचे यांना पॉली हाऊस साठी 12 लाख रुपये तर हिंगणी येथील प्रगतीशील शेतकरी अजय डेकाटे , वाहीतपूर येथील जगदीश महाकाळकर , आर्वी येथील यामीनी महल्ले , मोर्यापूर येथील रमेश राजाराम उमरे, धानोरा येथील रामदास बुचे, घोराड येथील त्रयंबक सोनबा माहुरे आदी शेतक-यांना 4 लाख रुपायापासून तर 18 लाख रुपयापर्यंत शेडनेट व पॉली हाऊससाठी कर्ज पुरवठा उपलब्ध करुन दिला आहे.
जिल्ह्याच्या अग्रणी बँकेतर्फे ग्रामीण भागातील 26 शाखाव्दारे शेतक-यांना कृषि विकासासाठी आवश्यक वित्त पुरवठ्यासह उच्च तंत्रज्ञानावर आधारीत शेती करण्यासाठी कर्ज पुरवठ्यास तांत्रिक माहितीही दिली जात असल्याची माहिती वरिष्ठ व्यवस्थापक एस.वाय. शिर्सीकर यांनी दिली.
0000
No comments:
Post a Comment