.प.क्र-384                                                                     दि.27.05.2021

शेतक-यांनी घरपोच बिण्याण्याकरीता शेतकरी गटाकडे नोंदणी करावी

वर्धा, ,दि.27 (जिमाका):-कोरोना 19 च्या पार्श्वभूमीवर जिल्हयात कडक लॉकडाऊन लागु करण्यात आला आहे. खरीप हंगाम लवकरच  सुरु होत असून शेतक-यांना  कृषि निविष्ठा  खरेदी कराव्या लागणार आहे. परंतु कृषि केंद्रावर  शेतक-यांची गर्दी होऊ नये यासाठी शेतक-यांना कृषि विभागामार्फत घरपोच बांधावर  खत पुरवठा  ही मोहिम राबविण्यात येत आहे. यासाठी शेतक-यांनी  त्यांच्या भागात आत्मा अंतर्गत नोंदणीकृत असलेल्या शेतकरी गटाकडे बियाणे व खताची मागणी नोंदवावी असे आवाहन  जिल्हा अधिक्षक कृषि अधिकारी यांनी केले आहे.

          शेतक-यांनी  त्यांच्या भागात असलेल्या आणि त्यांना सोयीच्या गटांकडे आपली नोंदणी करावी नोंदणी करतांना आत्मा अंतर्गत  ज्या गटाची नोंदणी झालेली आहे, त्याच गटांकडे नोंदणी होईल असे करावे,  यामुळे  100 टक्के  शेतक-यांची नोंदणी कोणत्या ना  कोणत्या गटाकडे  करणे शक्य होईल. 

          खते व बियाण्याची नोंदणी करतांना  शेतक-यांनी त्यांचे नाव, पत्ता, सर्वे नंबर, गट नंबर, मोबाईल क्रमांक, आधार क्रमांक (आधार कार्डशी लिंक असणारा) ज्या कृषि सेवा केंद्रामधुन  खत खरेदी  करावयाचे आहे,  त्यांच्या नावासह  रासायनिक खतांची व बियाण्याची मागणी गटाकडे करावी.  गटप्रमुखाने  रासायनिक खते व वाहतुक खर्चाकरीता लागणारी रक्कम सर्व सदस्याकडुन प्राप्त करुन  घ्यावी व कृषि  विभागाच्या संबधित कृषि सहाय्यकाकडे संपर्क साधावा.

          रासायनिक खताची मागणी गटांकडे प्राप्त झाल्यांनतर  गटप्रमुखानेच रासायनिक खते खरेदी करावी.  जेणेकरुन  सर्व शेतक-यांना  विक्री केंद्रावर जावे लागणार नाही.  केंद्रशासनाच्या पत्रानुसार  शेती पिकासाठी  एका शेतक-याला  त्याच्या आधार क्रमांकावर  प्रत्येक महिन्याला  50 गोण्या खत  व फळपिकासाठी  1 हजार 200 गोण्या खत खरेदी करता येते  त्यामुळे गटप्रमुखाने गटातील  शेतक-यांच्या नावे  स्वतंत्र पावती तयार करुन खताची खरेदी कावी.  शक्य असल्यास विक्रेत्यांनी मोबाईल ॲप  तयार करुन  शेतक-याची मागणी नोंदवून  घ्यावी व मोठया प्रमाणात मागणी असल्यास  मागणीप्रमाणे रासायनिक खते शेतक-यांच्या शेतापर्यंत  पोहोचवावे. कृषि सेवा केंद्र ते शेतकरी गट या वाहतूकीकरीता कृषि विभागाच्या अधिकारी व कर्मचा-यांनी समन्वयक म्हणुन काम करावे. बियाणे व वाहतुकीचा खर्च सबंधीत  शेतक-यांना करावा लागेल.

        मंडळ कृषि अधिकारी , कृषि पर्यवेक्षक, कृषि सहाय्यक किंवा तालुका तंत्रज्ञान सहाय्यक आत्मा यांनी  व्हिडिओ कॉलव्दारे  शेतकरी आणि  कृषि निविष्ठा विक्रेता यांचा समन्वय घडवून  रासायनिक  खते खरेदी व्यवहारामध्ये  पारदर्शकता  ठेवून  शेतक-यांची फसवणूक होणार नाही याची दक्षता घ्यावी.  तसेच जे शेतकरी वैयक्तिकरित्या  रासायनिक खते व बियाणे खरेदी करु इच्छितात अशा शेतक-यांनी आपल्या पसंतीच्या  कृषि केंद्र चालकाकडे भ्रमनध्वनी व्दारे किंवा व्हाट्सॲप व्दारे  मागणी नोंदवावी.  याबाबत काही अडचण असल्यास  सबंधित पंचायत समितीच्या कृषि विभागाशी संपर्क साधावा. असे कृषि विभागाने कळविले आहे.

                                                0000