उपराष्ट्रपतींच्या हस्ते शस्त्रक्रिया कक्षाचे उद्घाटन

    वर्धा दि.25 (जिमाका) :-  महात्मा गांधी आयुर्विज्ञान संस्थेत नव्याने बांधण्यात आलेल्या शस्त्रक्रिया कक्ष तसेच स्कील लॅबचे उद्घाटन उपराष्ट्रपती एम.वैंकय्या नायडू यांच्या हस्ते करण्यात आले. यावेळी उर्जामंत्री चंद्रशेखर बावनकुळे, खासदार डॉ. विकास महात्मे, कस्तुरबा हेल्थ सोसायटीचे अध्यक्ष धीरुभाई मेहता, अधिष्ठाता डॉ. किसन पातोंड, आयुर्विज्ञान संस्थेचे वैद्यकीय अधिक्षक डॉ. एस.पी.कलंत्री आदी  उपस्थित होते.

          यावेळी उपराष्ट्रपती श्री.नायडू यांनी, डॉक्टर्स येथे निवासी राहतात का, या वैद्यकीय संस्थेत जेनेरीक औषधींचे वाटप तसेच आयुर्वेदिक उपचार केले जातात का, आदी बाबींची विचारणा केली. यावेळी डॉ. कलंत्री यांनी पॉवर पॉईंट प्रेझेंटेशनद्वारे उपराष्ट्रपतींना वैद्यकीय संस्थेबद्दल माहिती दिली. यात स्वस्त दरात देण्यात येणाऱ्या औषधी, माता व बाल आरोग्य केंद्र, शस्त्रक्रिया कक्ष आणि देण्यात येणाऱ्या सुविधा, रुग्णालयाची माहिती सुविधा, ग्रामीण भागात देण्यात  येणाऱ्या वैद्यकीय सेवा, आरोग्य विमा, कर्करोगावरील उपचार आदी बाबींचा समावेश होता.

          यावेळी कस्तुरबा हेल्थ सोसायटीचे सचिव डॉ. बी. एस. गर्ग, डॉ. पूनम शिवकुमार,     डॉ. सुचिता तिडके, डॉ. चंद्रशेखर बडोले, डॉ. अजय शुक्ला, डॉ. दिलीप गुप्ता, डॉ. प्रकाश नागपूरे, डॉ. आश्विनी कलंत्री, डॉ. धीरज भंडारी, कस्तुरबा हेल्थ सोसायटीचे विश्वस्त तापडीया उपस्थित होते.

000000